*🐂 कर्जतमध्ये बैलाच्या हल्ल्यात युवकाचा मृत्यू; सहा जखमी — ‘हेल्प फाउंडेशन’च्या तत्परतेने बैल नियंत्रणात.*

छत्रपती संभाजी महाराज चौकात सकाळच्या घटनेने शहर हादरले; परिसरात भीतीचे वातावरण

        कर्जत – (प्रतिनिधी) : आज दिनांक २३ ऑक्टोबर रोजी सकाळच्या सुमारास कर्जत शहरातील छत्रपती संभाजी महाराज चौक परिसरात एक धक्कादायक घटना घडली. अचानक पिसाळलेल्या बैलाने लोकांवर हल्ला चढवला असून, या घटनेत तरुण अर्जुन म्हसे यांचा जागीच मृत्यू झाला आहे. तर आणखी पाच ते सहा नागरिक जखमी झाले असून त्यांच्यावर तातडीने कर्जत उपजिल्हा रुग्णालयात उपचार सुरू आहेत.

 

 

        स्थानिक नागरिकांच्या मते, या बैलाला काही दिवसांपूर्वी एका कुत्र्याने चावा घेतल्यामुळे तो पिसाळल्याची शक्यता वर्तवली जात आहे. अचानक हल्ला झाल्याने परिसरात एकच गोंधळ उडाला. नागरिकांनी स्वतःचा जीव वाचवण्यासाठी घरात आसरा घेतला. अनेकांनी दुकाने आणि वाहने बंद करून सुरक्षित स्थळी धाव घेतली. या घटनेमुळे शहरात भीतीचे वातावरण पसरले होते.

      दरम्यान, पिसाळलेल्या बैलाला पकडण्यासाठी खोपोली येथील ‘हेल्प फाउंडेशन’ संस्थेने तातडीने पुढाकार घेतला. संस्थेच्या पशुवैद्य डॉ. जितेंद्र लाड आणि त्यांच्या पथकाने घटनास्थळी धाव घेतली. तब्बल तासाभराच्या प्रयत्नांनंतर डॉ. लाड यांनी भूल देऊन बैलाला नियंत्रणात आणण्यात यश मिळवले. त्यांच्या प्रयत्नांमुळे आणखी जीवितहानी टळली.

      स्थानिक नागरिकांनी या संपूर्ण घटनेनंतर ‘हेल्प फाउंडेशन’ आणि त्यांच्या पथकाचे कौतुक केले असून, वेळेवर दाखविलेल्या तत्परतेमुळे शहरात पुन्हा शांती आणि सुरक्षिततेचे वातावरण निर्माण झाले आहे.